Nós

A banda, liderada por Sabela Olivares, amosa un proxecto que xira ao redor da funcionalidade e a vesatilidade da gaita, ademais da súa adaptación ás novas tecnoloxías do século XXI. Coa gaita como protagonista, Boroa presenta un conxunto de melodías de creación propia construíndo un universo sonoro que propón unha viaxe musical alén do Atlántico, que parte da nosa raíz e se achega a harmonías de diferentes xéneros musicais como o "swing", o "jazz manouche" ou o "ragtime". A proposta de Boroa ofrece un directo variado onde se integran, ademais dos temas propios, interpretacións de música contemporánea, de clásicos de cine e repertorio tradicional doutras culturas como a rumana ou a irlandesa. Cunha sonoridade singular, produto do estilo persoal dos tres integrantes, e unha mestura de melodías dialogadas, ritmos variados, arranxos creativos e adaptacións de temas pouco comúns para a gaita, a banda ofrece unha posta en escena atractiva e potente, co divertimento e a posta en valor do idioma universal, a música, como obxectivo.

Sabela Olivares

Gaita, piano, pandeireta e voz

Nacida en Vigo en 1981 adícase profesionalmente á música como intérprete e docente dende os 19 anos.

Posúe o Título Superior de Música na especialidade de Instrumentos da müsica Tradicional e Popular, o Título de Profesora na especialidade de Piano e o Título Profesional de Música na especialidade de Gaita.

Paralelamente, amplía a súa formación participando en distintos cursos e seminarios relacionados coa musicoterapia, a pedagoxía musical activa e a técnica instrumental

Dende o ano 2004 participa como intérprete e compositora en diferentes proxectos musicais coa gravación de diversos traballos discográficos.

No ano 2022 publica dous libros de valses para gaita e piano enfocados ao ensino da gaita nos que combina a finalidade práctica coa expresividade e o sentido musical no seu significado máis amplo.

Suso Bello

Guitarra e Voz

Produtor musical, compositor e intérprete en grupos como A Companhia do Ruído, Oito nun piso e Boroa, todos eles proxectos vencellados á lingua galega, que teñen como obxectivo a difusión da nosa lingua e a nosa cultura.

Ao longo da súa traxectoria profesional cabe destacar a composición e produción musical de múltiples traballos discográficos entre os que salientan no apartado de música infantil: “A Cuadrilla da fonte navegante” e “A Landra viaxeira e o amigo Lambón”.

Noutros eidos artísticos sobresae a súa actividade en traballos discográficos en lingua galega como: A Companhia do Ruído (2005), Chuvia 06(2006), Música e patacas (2008), había de chover merda(2010), Pensares galegos(2013), A Cuadrilla da fonte navegante(2013), O Punchi must go on(2018).

Alberto Millán

Baixo

Posúe os títulos de Grao Profesional nas especialidades de gaita e frauta travesa. Estudou baixo eléctrico na Escola de Música Moderna Estudio en Santiago de Compostela.

No ano 1995 comeza a exercer de mestre de gaita e na actualidade leva a sección de gaita e percusión na Asociación Cultural Tahúme de Olveira, ao mesmo tempo que realiza concertos didácticos de música tradicional e forma parte en varias formacións musicais de diversos estilos, entre as que cabe destacar Os Monifates, grupo de música tradicional e títeres.

Contratación

Dalle ao botón para poñerte en contacto con nós

Contacta connosco